DIY果醬工作坊

雖然市面上都有好多唔同既果醬出售, 但係其實自己落手落腳整都好簡單, 大人小朋友都好易學識, 仲可以保證啱自己口味同食品安全添!

第一步一定係揀自己鍾意既口味, 我哋之前就全家一齊去士多啤梨田到採摘咗啲新鮮既士多啤梨! 但係既然整開, 又點可以淨係整一款口味? 於是我哋就決定整埋雜莓果醬, 所以就係超級市場買埋需要既藍莓同野莓! 雪梨B仲邀請埋佢既best friend一齊黎我哋既工作坊學整果醬!

 除咗整既過程要開心, 食既過程都要安心。為咗安全同健康, 開始之前一定要小心咁洗乾淨哂啲食材, 然後就可以開始製作啦。將水果切開, 壓成果溶, 然後混和再完成烹調既步驟就大功告成啦, 可以將製成品放置冷藏!

 等待既期間, 就可以設計裝果醬既容器。今次我哋就準備咗玻璃樽, 小朋友們可以發揮自己既小宇宙黎設計瓶身, 用marker或畫筆親手繪畫圖案, 或者利用貼紙裝飾。加埋獨特既裝飾, 無論係送禮定自用都好適合! 完成後, 小朋友同大人都充滿成功感, 可以用自制既果醬黎配搭蛋糕、多士等等既甜品, 幸福感加倍!